Við erum skip á ólgandi grænum sjó

Áður en þessi bakþanki telst hafinn þá skal vera tekið fram að í þessum bakþanka verður ekkert gefið eftir þegar kemur að myndhverfingum, viðlíkingum og þess háttar. Þessi bakþanki verður mikið myndmálsrunk, eins og ljóð eftir Bubba Morthens.

Lífið er eins og sjórinn og við erum skipið sem siglir þar um. Við ferðumst með öldunum og vitum ekki hvað næsta bára ber í skauti sér fyrr en hún ber að dyrum. Við förum upp og niður til skiptis.

Við erum misstór skip, allt frá litlum smábátum upp í stór skemmtiferðaskip. Við höfum öll okkar stefnu, einhvern áfangastað. Stundum er auðvelt fyrir okkur að sjá hvert við þurfum að sigla til þess að komast nær þeim stað, stundum er auðvelt að finna hvernig sjórinn ólgar og vindurinn blæs og reikna út í kjölfarið hvernig seglið á að snúa. En stundum er þetta alls ekki svo auðvelt, stundum siglum við og siglum en vitum í raun ekki hvert við stefnum. Stundum vitum við hvert við viljum fara, einhver drauma-áfangastaður, en við vitum ekki hvar sá staður er.

„Viti maður ekki til hvaða hafnar hann siglir, er engin vindátt hagstæð“. Þessum fleygu orðum kastaði rómverski heimspekingurinn Seneca fram úr ermum sér á sínum tíma. Gaman að því.

Ég er alls ekki fyrsti maðurinn til þess að varpa fram myndmáli um lífið og skip, eins og gefið hefur verið til kynna. Heimspekingurinn Seneca setti fram slíkt myndmál í setningunni sem ég lét fylgja fyrir ofan. Einnig hefur slíkt myndmál verið sett fram af rithöfundinum John Augustus Shedd, sem er ekki sami maður og heimspekingurinn John Graves Shedd.

Shedd gaf okkur setninguna; „Skip í höfn er öruggt, en það er ekki það sem skip eru smíðuð fyrir.“

Þetta er góð setning, en ég ætla ekki að staldra við og ígrunda hana nánar. Ég ætla að halda ótrauður áfram eins og lífið sjálf. Lífið tekur enga pásu. Við getum reynt eins og við viljum að setja niður akkeri en sjórinn ólgar alltaf. Sjórinn fleygist áfram og oft erum við í óða önn við það eitt að reyna halda í við hann.

Eins og setningin góða segir; „Lífið ferðast ansi hratt. Ef þú stoppar ekki og lítur í kringum þig öðru hvoru gætirðu misst af því.“

Þetta sagði prakkarinn Ferris Bueller í myndinni Ferris Bueller‘s Day Off. Góð setning.

 

Rétt í lokin á þessum bakþanka, rétt áður en ég hætti að blóðrunka myndmálshvötinni eins og ég fái borgað fyrir það, þá ætla ég að setja fram mína eigin setningu um lífið og skip. Setningu sem hægt er að vitna í næstu ár og aldir líkt og aðrir hafa gert. Mín setning er í lengri kantinum en er svohljóðandi;

Lífið er eins og sjórinn og við erum skipið sem siglir þar um. Við ferðumst upp og niður með öldunum og erum misstór skip, allt frá litlum smábátum upp í stór skemmtiferðaskip. Við ferðumst upp og niður með öldunum og þess vegna er kannski best að vera bara kafbátur.